ક્રિસ્ટી કોવેન્ટ્રી IOCના સૌપ્રથમ મહિલા વડા ચૂંટાયા

ક્રિસ્ટી કોવેન્ટ્રી IOCના સૌપ્રથમ મહિલા વડા ચૂંટાયા

Blog Article

ઈન્ટરનેશનલ ઓલિમ્પિક કમિટી (આઈઓસી)ના નવા વડા તરીકે ઝિમ્બાબ્વેના રમતગમત પ્રધાન ક્રિસ્ટી કોવેન્ટ્રી ચૂંટાયા છે. કોવેન્ટ્રી આઈઓસીના 131 વર્ષના ઈતિહાસમાં 10માં વડા તરીકે ચૂંટાયા છે. સાત સભ્યો આ પદ માટે રેસમાં હતા અને ગુપ્ત મતદાનના અંતે કોવેન્ટ્રી વૈશ્વિક સંસ્થાના વડા ચૂંટાયા હતા. તેઓ આઈઓસીના સર્વોચ્ચ પદે ચૂંટાયેલા સૌપ્રથમ મહિલા તેમજ પ્રથમ આફ્રિકન છે.

કોવેન્ટ્રી પોતે ખેલાડી, સ્વિમર છે અને બે વખત સ્વિમિંગમાં ઓલિમ્પિક ગોલ્ડ મેડલ પણ જીતી ચૂક્યા છે. ગયા સપ્તાહે ગુરુવારે આઈઓસીના 97 સભ્યોએ મતદાન કર્યું હતું, જેમાં પ્રથમ રાઉન્ડમાં જ કોવેન્ટ્રીનો વિજય થયો હતો. ક્રિસ્ટી કોવેન્ટ્રીનો કાર્યકાળ આઠ વર્ષનો રહેશે. 23 જૂન 2025ના રોજ તેઓ આઈઓસીના વડાનો કાર્યભાર સંભાળશે. આ સાથે જ 2028માં લોસ એન્જલસમાં યોજાનારી ઓલિમ્પિક્સમાં તેમની ભૂમિકા મહત્વની બની રહેશે. 2036માં ભારતમાં ઓલિમ્પિકના આયોજનને મંજુરી પણ તેમના કાર્યકાળમાં જ મળી શકે છે.

કોવેન્ટ્રી આઈઓસીના વિદાય લઈ રહેલા વડા થોમસ બાકનું સ્થાન લેશે

41 વર્ષના કોવેન્ટ્રી માટે આઈઓસીના વડા તરીકે સૌથી મોટો પડકાર રમત ક્ષેત્ર અને રાજકીય મોરચે રહેલા પડકારો વચ્ચે ઓલિમ્પિક ચળવળને આગળ ધપાવવાનો રહેશે. 2028 ઓલિમ્પિક્સમાં યજમાન અમેરિકાના રાષ્ટ્રપતિ ડોનાલ્ડ ટ્રમ્પ સાથે રાજદ્વારી તાલમેલ જાળવવો પણ એક પડકાર રહેશે. આ ઉપરાંત 2036ના ઓલિમ્પિકની યજમાની ભારત અને મધ્ય પૂર્વમાંથી કોને સોંપવી તેનો નિર્ણય પણ કોવેન્ટ્રીએ કરવાનો રહેશે.